அத்துருகிரிய பொலிஸ் பிரிவில் இரண்டு மனிதக் கொலைகளைச் செய்த சம்பவத்தின் துப்பாக்கிச் சூடு நடத்தியவர் உட்பட நால்வர் கைது செய்யப்பட்டுள்ளனர்.
கடந்த ஓகஸ்ட் மாதம் 17 ஆம் திகதியும் இந்த மாதம் 08 ஆம் திகதியும் அத்துருகிரிய பொலிஸ் பிரிவுக்குள் இடம்பெற்ற இந்த இரண்டு மனிதக் கொலைகள் தொடர்பில் பொலிஸார் விசாரணையைத் தொடங்கியிருந்தனர்.
அதற்கமைய மேற்கொள்ளப்பட்ட விசாரணையில், குறித்த குற்றத்திற்காகத் துப்பாக்கிச் சூடு நடத்தியவர் உட்பட இச்சம்பவத்திற்கு உதவி ஒத்தாசை புரிந்த மூவரும் கைது செய்யப்பட்டுள்ளனர்.
இவ்வாறு கைது செய்யப்பட்டவர்கள் 21, 24, 41 மற்றும் 45 ஆகிய வயதுடைய பாதுக்கை, பண்டாரகம, மொரந்துடுவ மற்றும் அலுபோமுல்ல ஆகிய பகுதிகளைச் சேர்ந்தவர்களாவர்.
அத்துடன் துப்பாக்கிச் சூடு நடத்திய சந்தேகநபரிடமிருந்து கைக்குண்டு ஒன்றையும் பொலிஸார் இதன்போது மீட்டுள்ளதுடன், சந்தேகநபர் ஹொரணை நீதவான் நீதிமன்றத்தில் நிலுவையிலுள்ள வழக்கு ஒன்றிற்கு பிடியாணை பிறப்பிக்கப்பட்டவர் என்பதும் தெரியவந்துள்ளதாக பொலிஸார் தெரிவித்தனர்.
சம்பவம் தொடர்பில் அத்துருகிரிய பொலிஸார் மேலதிக விசாரணைகளை மேற்கொண்டு வருகின்றனர்.
