ஒழுங்கமைக்கப்பட்ட குற்றச் செயல்களில் ஈடுபடும் முக்கிய பாதாள உலகக் குழுவினரான நதுன் சிந்தக விக்ரமரத்ன எனப்படும் ‘ஹரக் கட்டா’ மற்றும் மந்தினு பத்மசிறி எனப்படும் ‘கெஹெல்பத்தர பத்மே’ ஆகிய இருவருக்கும் இடையே ஏற்பட்ட மோதல் சம்பவம் தொடர்பில் சிறைச்சாலைகள் திணைக்களம் விசேட விசாரணையொன்றை ஆரம்பித்துள்ளது.
குறித்த மோதல் சம்பவம் குறித்து விரிவான விசாரணைகளை முன்னெடுப்பதற்காக உதவிச் சிறைச்சாலை அத்தியட்சகர் ஒருவர் நியமிக்கப்பட்டுள்ளதாகச் சிறைச்சாலைகள் திணைக்களம் தெரிவித்துள்ளது.
வெலிசர சிறைச்சாலையில் தடுத்து வைக்கப்பட்டுள்ள ‘ஹரக் கட்டா’ மற்றும் ‘கெஹெல்பத்தர பத்மே’ ஆகிய இருவருக்குமிடையே நேற்று செவ்வாய்க்கிழமை (22) இரவு இம் மோதல் இடம்பெற்றுள்ளதுடன், இதில் காயமடைந்த கெஹெல்பத்தர பத்மே வைத்தியசாலையில் அனுமதிக்கப்பட்டுள்ளார்.
அவர் தற்போது வெலிசறை சிறைச்சாலை வைத்தியசாலையில் சிகிச்சை பெற்று வருவதாகச் சிறைச்சாலைகள் திணைக்களம் மேலும் தெரிவித்துள்ளது.
