முகநூல் உள்ளிட்ட சமூக ஊடகங்களில் பணம் சம்பாதிக்கும் நடைமுறைகள் அதிகரித்துள்ள நிலையில், பெற்றோரின் அனுமதியுடனோ அல்லது அனுமதியின்றியோ சிறுவர்களின் நிழற்படங்கள் மற்றும் காணொளிகள் இணையத்தில் பதிவேற்றப்படுவது அதிகரித்துள்ளதாக தெரிவிக்கப்பட்டுள்ளது.
சிறுவர்களின் திறமைகள் மற்றும் சுவாரஸ்யமான செயற்பாடுகளை வெளிப்படுத்துவதாகக் கூறி, சில நபர்கள் மற்றும் அமைப்புகள் இவ்வாறான காணொளிகளை வணிக நோக்கங்களுக்காக பயன்படுத்துவதாகவும் அவதானிக்கப்பட்டுள்ளது.
சிறுவர்களின் அன்றாட வாழ்க்கையை வெளிப்படுத்தும் காணொளிகள் மற்றும் விளம்பரங்கள், அவர்களின் தனிப்பட்ட பாதுகாப்புக்கு அச்சுறுத்தலை ஏற்படுத்தக்கூடும் எனவும் எச்சரிக்கை விடுக்கப்பட்டுள்ளது.
அத்துடன், இணையத்தில் பதிவேற்றப்படும் நிழற்படங்கள் மற்றும் காணொளிகள் செயற்கை நுண்ணறிவு தொழில்நுட்பத்தின் ஊடாக தவறான அல்லது பாலியல் ரீதியான உள்ளடக்கங்களை உருவாக்கவும் பயன்படுத்தப்படக்கூடிய அபாயம் காணப்படுவதாக எச்சரிக்கப்பட்டுள்ளது.
எனவே, சிறுவர்களைப் பாதுகாக்கும் வகையில், சமூக ஊடகங்களைப் பயன்படுத்தும்போது பெற்றோர்களும் சிறுவர்களின் பராமரிப்பு மற்றும் பாதுகாப்புக்குப் பொறுப்பானவர்களும் மிகுந்த விழிப்புணர்வுடனும் பொறுப்புடனும் செயற்படுமாறு அறிவுறுத்தப்பட்டுள்ளது.
