இலங்கையைச் சேர்ந்த இயக்குநர் லலித் ரத்நாயக்க இயக்கிய ‘ரிவர்ஸ்டன்’ (Riverstone) திரைப்படம், 99வது
ஆஸ்கார் அகடமி விருதுகளுக்கான இலங்கையின் அதிகாரப்பூர்வ சமர்ப்பிப்பாக தேர்வு செய்யப்பட்டுள்ளது.
இலங்கையின் தேசிய திரைப்படக் கூட்டுத்தாபனம் வெளியிட்டுள்ள அதிகாரப்பூர்வ தகவலின்படி, இந்தத் தேர்வு National Oscars Selection Committee of Sri Lanka – NOSCSL என்ற ஒன்பது பேர் கொண்ட குழுவினால் மேற்கொள்ளப்பட்டுள்ளது.
திரைப்படத் துறையைச் சேர்ந்த அனுபவம் வாய்ந்த இயக்குநர்கள், தயாரிப்பாளர்கள், திரைப்பட விமர்சகர்கள், இசையமைப்பாளர் மற்றும் திரைப்பட விழா நிபுணர்கள் உள்ளிட்டோர் இந்தக் குழுவில் இடம்பெற்றிருந்தனர்.
இலங்கையின் அதிகாரப்பூர்வ ஆஸ்கர் சமர்ப்பிப்பைத் தெரிவு செய்வதற்காக மொத்தம் ஆறு திரைப்படங்கள் பரிசீலிக்கப்பட்டன.
அவை ‘Riverstone’, ‘Father’, ‘Cricket Saadhu’, ‘Anthony’, ‘Ayu’ மற்றும் ‘Vihaga Premaya’ ஆகிய திரைப்படங்களாகும்.
இதில், ‘Ayu’ மற்றும் ‘Vihaga Premaya’ திரைப்படங்கள் அகாடமி விருதுகளுக்கான தகுதி விதிமுறைகளை பூர்த்தி செய்யாததால் தகுதியற்றதாக அறிவிக்கப்பட்டன.
இதனையடுத்து, தகுதி பெற்ற நான்கு திரைப்படங்களில் இருந்து ‘Riverstone’ மற்றும் ‘Father’ ஆகிய இரண்டு திரைப்படங்கள் இறுதிக்கட்ட பரிசீலனைக்காகத் தெரிவு செய்யப்பட்டன.
இறுதியாக, குழுவின் ஒன்பது உறுப்பினர்களின் சுயாதீன வாக்கெடுப்பின் மூலம் ‘Riverstone’ திரைப்படம் ஒருமனதாக இலங்கையின் அதிகாரப்பூர்வ சமர்ப்பிப்பாகத் தெரிவு செய்யப்பட்டதாக தேசிய திரைப்படக் கூட்டுத்தாபனம் தெரிவித்துள்ளது.
மேலும், இந்தப் புதிய தேசியத் தெரிவு நடைமுறையின் கீழ் இலங்கையை பிரதிநிதித்துவப்படுத்தும் முதல் திரைப்படம் ‘Riverstone’ என தேசிய திரைப்படக் கூட்டுத்தாபனத்தின் தலைவர் சுதத் மஹாதிவுல்வெவ தெரிவித்துள்ளார்.
சர்வதேச திரைப்படப் பிரிவுக்கான அனைத்து நாடுகளின் சமர்ப்பிப்புகளும் அகாடமியின் விதிமுறைகளின்படி பரிசீலிக்கப்படும். 99வது ஆஸ்கர் விருது விழா 2027 மார்ச் 14ஆம் தேதி நடைபெற உள்ளது.
இலங்கைத் திரைப்படத்துறைக்கு சர்வதேச அரங்கில் மற்றுமொரு முக்கியமான வாய்ப்பாக இந்தத் தெரிவு அமைந்துள்ளது.
