வெலிசர கடற்படை முகாமுக்குள் அமைக்கப்பட்டுள்ள அதியுயர் பாதுகாப்பு சிறைச்சாலையில் தடுத்து வைக்கப்பட்டுள்ள கைதிகளுக்கு கடற்படை சிப்பாய் ஒருவர் மரண அச்சுறுத்தல் விடுத்துள்ளதாகவும், அவர்களின் உயிருக்கு ஆபத்து ஏற்படக்கூடிய நிலை உருவாகியுள்ளதாகவும் சிறைக்கைதிகளின் உரிமைகளைப் பாதுகாக்கும் குழு குற்றம் சாட்டியுள்ளது.
சிறைக்கைதிகளின் உரிமைகளைப் பாதுகாக்கும் குழுவின் காரியாலயத்தில் நேற்று (5) நடைபெற்ற ஊடகவியலாளர் சந்திப்பில் கலந்துகொண்டு கருத்து தெரிவிக்கும்போதே அக்குழுவின் ஒருங்கிணைப்பாளர் சுதேஷ் நந்திமால் சில்வா மேற்கண்டவாறு தெரிவித்துள்ளார்.
அவர் அங்கு மேலும் கூறுகையில்,
வெலிசர கடற்படை முகாமுக்குள் அமைக்கப்பட்டுள்ள இந்த சிறைச்சாலையில் கடுமையான மற்றும் விசேட குற்றங்களுடன் தொடர்புடையவர்கள் தடுத்து வைக்கப்பட்டுள்ளனர்.
கடந்த 28ஆம் திகதி கடற்படை சிப்பாய் ஒருவர், ‘நீங்கள் சிறைச்சாலைக்கு பெரியவர்களாக இருக்கலாம் எங்களுக்கு நீங்கள் பெரியவர்கள் அல்ல. எனது கையில் ஆயுதம் கிடைத்தால் உங்கள் அனைவரையும் சுட்டுக்கொன்று விடுவேன்’ என கைதிகளை அச்சுறுத்தியுள்ளார்.
இதனைத் தொடர்ந்து கைதிகளின் உயிருக்கு ஆபத்து ஏற்படுமா என்ற நியாயமான அச்சம் ஏற்பட்டுள்ளது. அவர்களுக்கு உணவு வழங்குதல், பாதுகாப்பு வழங்குதல் மற்றும் வெளியில் அழைத்துச் செல்லுதல் உள்ளிட்ட பணிகளில் கடற்படையினர் ஈடுபடுகின்றனர்.
கடந்த 23ஆம் திகதி சிறைச்சாலை தலைமையகத்தைச் சேர்ந்த அதிகாரியொருவர் தடிகள் மற்றும் தடிகளுக்கு ஒத்த பொருட்களுடன் சென்று, தேவையற்ற வகையில் நடந்துகொண்டால் சில விடயங்கள் இடம்பெறக்கூடும் என மறைமுகமாக அச்சுறுத்தியுள்ளார்.
கைதிகளை சந்திக்க குடும்பத்தினரும் சட்டத்தரணிகளும் பல மணிநேரம் காத்திருக்க வேண்டியுள்ளது. வீடுகளில் இருந்து கொண்டுவரப்படும் உணவும் கடுமையான பரிசோதனைக்கு உட்படுத்தப்படுகிறது.
கைதிகள் சிறைச்சாலை அத்தியட்சகரிடம் முறைப்பாடு செய்து பொலிஸில் தெரிவிக்க அனுமதி கோரியபோதும், அவர் தானே முறைப்பாடு செய்வதாக கூறி நடவடிக்கை எடுக்கவில்லை.
மேலும், கண்காணிப்பு கமராக்கள் மாற்றப்பட்டுள்ளதாகவும் தகவல்கள் கிடைத்துள்ளன. இதனால் திட்டமிட்ட சதித்திட்டம் தொடர்பான சந்தேகம் எழுந்துள்ளது.
நீர்கொழும்பு சிறைச்சாலை கைதிகள் கொல்லப்பட்ட சம்பவத்திலும் இதுவரை உரிய சட்ட நடவடிக்கை எடுக்கப்படவில்லை. மெகசின் சிறைச்சாலையிலும் கைதி தாக்கப்பட்டு உயிரிழந்த சம்பவம் இடம்பெற்றுள்ளது.
இந்த நிலைமையில் வெலிசர கைதிகளுக்கு ஏதேனும் ஆபத்து ஏற்பட்டால் அது திட்டமிட்ட நடவடிக்கையாக இருக்கலாம். ஏற்கனவே மகாபாகே பொலிஸ் நிலையத்தில் ஜே. ஏசிலின் என்ற கைதியின் தாயார் மரண அச்சுறுத்தல் தொடர்பில் முறைப்பாடு செய்துள்ளார்.
