சவூதி அரேபியாவில் மரண தண்டனையை எதிர்நோக்கியுள்ள இலங்கைப் பிரஜையான சிவராசா அனோஜன் சிறையில் தாக்கப்பட்டதாக வெளியாகியுள்ள தகவல் தொடர்பில் அரசாங்கம் விரைந்து நடவடிக்கை எடுக்க வேண்டும் என இலங்கைத் தமிழ் அரசுக் கட்சியின் பாராளுமன்றக் குழுத் தலைவர் சாணக்கியன் இராசமாணிக்கம் தெரிவித்துள்ளார்.
பாராளுமன்றத்தில் நேற்று (07) உரையாற்றிய அவர், அனோஜனின் குடும்பத்தினர் சிறையில் கத்தியால் தாக்கப்பட்டதாக தெரிவித்துள்ள நிலையில், சவூதி சிறைச்சாலை தரப்பு நகக் கீறல்களால் காயம் ஏற்பட்டதாக குறிப்பிட்டுள்ளதாக கூறினார்.
அனோஜனின் பாதுகாப்பை உறுதி செய்வதுடன், அவரை பாதுகாப்பாக இலங்கைக்கு அழைத்து வருவதற்கான நடவடிக்கைகளை அரசாங்கம் துரிதப்படுத்த வேண்டும் என அவர் வலியுறுத்தினார்.
மேலும், சவூதி அரேபியாவுக்கு விசேட குழுவை அனுப்புவது தொடர்பில் முன்னர் அரசாங்கம் தெரிவித்திருந்த நிலையில், அதற்கு சவூதி தரப்பின் அனுமதி கிடைத்துள்ளதா என்பது உள்ளிட்ட பல்வேறு கேள்விகளுக்கும் அரசாங்கம் தெளிவான பதிலை வழங்க வேண்டும் என சாணக்கியன் இராசமாணிக்கம் கோரிக்கை விடுத்தார்.
அனோஜனை பாதுகாப்பாக நாட்டுக்கு அழைத்து வர அரசாங்கம் மேற்கொள்ளும் அனைத்து நடவடிக்கைகளுக்கும் தமது முழுமையான ஒத்துழைப்பை வழங்குவதாகவும் அவர் தெரிவித்தார்.
