இலங்கையில் குழந்தைகளின் ஊட்டச்சத்து நிலை குறித்து உலக வங்கி எச்சரிக்கை

இலங்கையில் சிறுவர்களிடையே ஊட்டச்சத்து குறைபாடு மற்றும் வளர்ச்சி குன்றிய நிலை அதிகரித்து வருவது, பொருளாதார நெருக்கடியின் நீண்டகால தாக்கத்தை வெளிப்படுத்துவதாக உலக வங்கி தெரிவித்துள்ளது.

உலக வங்கியின் சமீபத்திய அறிக்கையின்படி, 2023ஆம் ஆண்டில் 20.7 சதவீதமாக இருந்த வறுமை வீதம், 2025ஆம் ஆண்டில் 16.9 சதவீதமாகக் குறையும் என எதிர்பார்க்கப்படுகிறது. எனினும், இது 2019ஆம் ஆண்டின் 11.5 சதவீதத்துடன் ஒப்பிடுகையில் இன்னும் அதிகமாகும்.

அதேவேளை, உண்மையான ஊதியம் 2019ஆம் ஆண்டுக்கு முந்தைய நிலையை விட சுமார் 12 சதவீதம் குறைந்துள்ளதாகவும், 2026ஆம் ஆண்டில் சுமார் 40 சதவீதமான மக்கள் வறுமையில் அல்லது வறுமைக் கோட்டுக்கு அருகில் வாழக்கூடும் எனவும் உலக வங்கி சுட்டிக்காட்டியுள்ளது.

பொருளாதார மீட்சியின் வேகம் குறைவடைந்தால், மக்களின் வருமானத்தில் மேலும் பாதிப்பு ஏற்பட்டு, கடுமையான பொருளாதார நெருக்கடி உருவாகும் அபாயம் உள்ளதாகவும் உலக வங்கி எச்சரித்துள்ளது.