கொழும்பு லேடி ரிட்ஜ்வே சிறுவர் வைத்தியசாலையின் இணையத்தளத்தில் வெளியிடப்பட்ட மருந்துகள் மற்றும் மருத்துவ உபகரணங்களுக்கான நன்கொடைத் தேவைகள் தொடர்பான ஆவணங்கள் குறித்து விசாரணை நடத்துமாறு இலஞ்ச ஊழல் ஆணைக்குழுவில் முறைப்பாடு சமர்ப்பிக்கப்பட்டுள்ளது.
மருத்துவ மற்றும் சிவில் உரிமைகளுக்கான மருத்துவர்களின் தொழிற்சங்கக் கூட்டமைப்பின் தலைவர் விசேட மருத்துவ நிபுணர் சமல் சஞ்சீவ உள்ளிட்ட குழுவினர் இந்த முறைப்பாட்டை முன்வைத்துள்ளனர்.
குறித்த ஆவணங்கள் 2022ஆம் ஆண்டுக்குரியவை எனக் கூறப்பட்டாலும், தன்னிடமுள்ள திரைப்பிடிப்புகளில் 2026ஆம் ஆண்டு திகதிகள் காணப்படுவதாக சமல் சஞ்சீவ தெரிவித்துள்ளார். மேலும், 2022ஆம் ஆண்டு முதல் பெறப்பட்ட நன்கொடைகளின் பணம் மற்றும் மருந்துகள் எவ்வாறு பயன்படுத்தப்பட்டன என்பதையும் விசாரிக்க வேண்டும் என அவர் வலியுறுத்தியுள்ளார்.
இந்த விவகாரம் தொடர்பில் தொழில்நுட்ப மற்றும் நிதி விசாரணைகளை முன்னெடுத்து, உரிய நடவடிக்கை எடுக்குமாறும் அவர் கோரிக்கை விடுத்துள்ளார்.
