இலஞ்ச ஊழல் விசாரணை ஆணைக்குழுவில் முன்னிலையான பாராளுமன்ற உறுப்பினர் சாமர சம்பத் தசநாயக்க, சற்று முன்னர் கைதுசெய்யப்பட்டுள்ளார்.
இன்று திங்கட்கிழமை (12) வாக்குமூலம் வழங்குவதற்காக முன்னிலையான நிலையில் கைது செய்யப்பட்டுள்ளார்.
பொஸ்பேட் ஏற்றுமதியை உரிய நடைமுறைகளைப் பின்பற்றாமல் குறிப்பிட்ட மூன்று நிறுவனங்கள் ஊடாக மாத்திரம் மேற்கொள்ள வசதிகளை ஏற்படுத்திக் கொடுத்தமைக்காக, அந்த நிறுவனங்களிடமிருந்து 8.1 மில்லியன் ரூபா இலஞ்சமாகப் பெறப்பட்டதாகக் கூறப்படும் குற்றச்சாட்டு தொடர்பில் விசாரணைகள் முன்னெடுக்கப்படுவதாகத் தெரிவிக்கப்படுகிறது.
அத்துடன், குறித்த நிறுவனங்கள் பொஸ்பேட் ஏற்றுமதிக்குத் தேவையான உரிமங்களைப் பெற்றுக்கொள்வதற்கு உதவியதாகவும் குற்றச்சாட்டுகள் முன்வைக்கப்பட்டுள்ளன.
இதேவேளை, சாமர சம்பத் தசநாயக்க ஆரம்பக் கைத்தொழில்கள் இராஜாங்க அமைச்சராகப் பதவி வகித்த காலத்தில் அவரது தனிப்பட்ட செயலாளராகப் பணியாற்றிய சுமதிபால லியனாராச்சி என்பவரும் இந்த விசாரணை தொடர்பில் கைது செய்யப்பட்டுள்ளார். அவர் தற்போது விளக்கமறியலில் வைக்கப்பட்டுள்ளார்.
