பெருந்தொகையான கேரள கஞ்சாவுடன் புத்தளம் நகரசபையின் முன்னாள் உறுப்பினர் ஒருவர் பொலிஸ் போதைப்பொருள் ஒழிப்புப் பணியகத்தினரால் கைது செய்யப்பட்டுள்ளார்.
பொலிஸ் போதைப்பொருள் ஒழிப்புப் பணியகத்துக்குக் கிடைத்த இரகசியத் தகவலின் அடிப்படையில், புத்தளம் தில்லையடிப் பகுதியில் முன்னெடுக்கப்பட்ட விசேட தேடுதல் நடவடிக்கையின்போதே சந்தேகநபர் கைது செய்யப்பட்டுள்ளார்.
தில்லையடிப் பகுதியிலிருந்து புத்தளம் நகரை நோக்கி மோட்டார் சைக்கிளில் கேரள கஞ்சாவைக் கடத்திச் செல்வதாகக் கிடைத்த தகவலையடுத்து, குறித்த மோட்டார் சைக்கிளை இடைமறித்துப் பொலிஸார் சோதனையிட்டுள்ளனர்.
இதன்போது, மோட்டார் சைக்கிளில் மறைத்து வைக்கப்பட்டிருந்த கேரள கஞ்சா கைப்பற்றப்பட்டுள்ளதாகப் பொலிஸார் தெரிவித்துள்ளனர்.
கைப்பற்றப்பட்ட கேரள கஞ்சா மற்றும் கடத்தலுக்குப் பயன்படுத்தப்பட்டதாகக் கூறப்படும் மோட்டார் சைக்கிளுடன் சந்தேகநபரைப் புத்தளம் நீதவான் நீதிமன்றத்தில் ஆஜர்படுத்த நடவடிக்கை எடுக்கப்பட்டுள்ளதாக பொலிஸ் போதைப்பொருள் ஒழிப்புப் பணியகம் தெரிவித்துள்ளது.
சம்பவம் தொடர்பில் சந்தேகநபரிடம் மேலதிக விசாரணைகள் முன்னெடுக்கப்பட்டு வருகின்றன.
