இலங்கையின் பழைய அரசியல் கலாசாரத்திற்கு எதிராக, நேற்று கொழும்பு கோட்டை ரயில் நிலையம் முன்பாக இளைஞர் அமைப்புகள் மௌனப் போராட்டமொன்றை முன்னெடுத்தனர்.
‘வெள்ளை உடையில், கருப்பு நோக்கத்துடன் வருகிறோம்’ என்ற கருப்பொருளில் நடைபெற்ற இந்தப் போராட்டத்தை, ‘நியூ விங்ஸ்’ (அலுத் பியபத்) அமைப்பும் ஏனைய இளைஞர் குழுக்களும் இணைந்து ஏற்பாடு செய்திருந்தன.
ஊழல், இனவாதம், மத தீவிரவாதம், திட்டமிட்ட குற்றச்செயல்கள் மற்றும் அரசியல் நோக்கங்களுக்காக மதம் பயன்படுத்தப்படுவதற்கு எதிராகப் போராட்டக்காரர்கள் குரல் எழுப்பினர்.
மேலும், சட்டம் அனைவருக்கும் சமமாக அமுல்படுத்தப்பட வேண்டும், நீதி நிலைநாட்டப்பட வேண்டும், ஊழல் நிறைந்த அரசியல் கலாசாரம் மீண்டும் தலைதூக்கக் கூடாது என்பதையும் வலியுறுத்தி, வீதியோர நாடகத்தையும் பதாகை ஏந்திய போராட்டத்தையும் முன்னெடுத்தனர்.
