ஜெர்மனியின் பிரெமர்ஹாவன் (Bremerhaven) துறைமுகத்தில், TUI Cruises நிறுவனத்துக்குச் சொந்தமான Mein Schiff 3 சொகுசுக் கப்பல், துறைமுகத்தில் நிறுத்தப்பட்டிருந்த MSC Victorine கொள்கலன் கப்பலுடன் மோதிய தருணத்தைப் பதிவு செய்த புதிய காணொளி வெளியாகியுள்ளது.
கடந்த ஒக்டோபர் 25ஆம் திகதி இடம்பெற்ற இந்தச் சம்பவத்தின்போது, பலத்த காற்று காரணமாக சொகுசுக் கப்பல் பக்கவாட்டில் நகர்ந்ததாகவும், அதனைக் கட்டுப்படுத்த இழுவைப் படகுகள் (Tugboats) உதவியபோதும் மோதலைத் தவிர்க்க முடியவில்லை என்றும் தெரிவிக்கப்பட்டுள்ளது.
இந்த மோதலில் சொகுசுக் கப்பலின் பல உயிர்காக்கும் படகுகள் சேதமடைந்துள்ளன. கொள்கலன் கப்பலுக்கும் சேதம் ஏற்பட்டுள்ளதாகத் தகவல்கள் தெரிவிக்கின்றன.
சம்பவத்தின்போது சொகுசுக் கப்பலில் 2,428 பயணிகளும் 922 பணியாளர்களும் இருந்ததாகக் கூறப்படுகிறது. எனினும், இதுவரை எவருக்கும் காயம் ஏற்பட்டதாகத் தகவல் வெளியாகவில்லை.
மோதலைத் தொடர்ந்து Mein Schiff 3 மீண்டும் துறைமுகத்திற்குத் திரும்பியுள்ளது. கப்பலுக்கு ஏற்பட்ட சேதங்கள் குறித்து மதிப்பீடுகள் மேற்கொள்ளப்பட்டு வருகின்றன.
பலத்த காற்று மற்றும் மோசமான வானிலை இந்தச் சம்பவத்துக்குப் பங்களித்திருக்கலாம் எனத் தெரிவிக்கப்படும் நிலையில், விபத்துக்கான துல்லியமான காரணம் குறித்து ஜெர்மன் நீர்ப்போக்குவரத்துப் பொலிஸார் விசாரணைகளை முன்னெடுத்து வருகின்றனர்.
