ருவன்வெலிசாய தூபிக்கு பாதிப்பு ஏற்படும் வகையில் அநுராதபுரம் அபிவிருத்தித் திட்டத்தின் கீழ் அகழ்வுப் பணிகள் இடம்பெறக்கூடாது என்றும், இத்திட்டத்துக்கு இந்தியா பங்காளியாக இருக்கக்கூடாது என்றும் பிவிதுறு ஹெல உறுமய கட்சியின் தலைவர் உதய கம்மன்பில தெரிவித்துள்ளார்.
கொழும்பில் உள்ள கட்சியின் அலுவலகத்தில் இன்று (நவம்பர் 2) நடைபெற்ற ஊடகவியலாளர் சந்திப்பில் அவர் இதனைக் குறிப்பிட்டுள்ளார்.
ருவன்வெலிசாய பௌத்தர்களின் புனித தலமாகவும், சிங்கள மக்களின் முக்கியமான அடையாளமாகவும் விளங்குவதாகத் தெரிவித்த அவர், அநுராதபுரம் அபிவிருத்தித் திட்டத்தின் கீழ் தூபிக்கு அண்மையில் அகழ்வுப் பணிகள் மேற்கொள்ளப்பட்டால் அதற்குப் பாதிப்பு ஏற்படக்கூடும் எனக் குறிப்பிட்டுள்ளார்.
மேலும், தேசிய மக்கள் சக்தி அரசாங்கம் பௌத்த மதத்துக்கும் சிங்கள மக்களுக்கும் எதிராகச் செயற்படுவதாகக் குற்றஞ்சாட்டிய அவர், புனித அநுராதபுர நகர அபிவிருத்தித் திட்டம் தொடர்பிலும் தனது எதிர்ப்பை வெளியிட்டுள்ளார்.
குறித்த திட்டத்துக்கு இந்தியா நிதியுதவி வழங்குவதாகக் கூறப்படும் நிலையில், ருவன்வெலிசாயவுக்கு பாதிப்பு ஏற்படக்கூடிய நடவடிக்கைகளுக்கு இந்தியா ஆதரவளிக்கக்கூடாது எனவும் அவர் வலியுறுத்தியுள்ளார்.
அத்துடன், ஜனாதிபதி அநுரகுமார திஸாநாயக்க தன்னைத் தொடர்புபடுத்திப் பல்வேறு தவறான குற்றச்சாட்டுகளை முன்வைத்துள்ளதாகக் கூறிய கம்மன்பில, ஜனாதிபதியின் பதவிக்காலம் நிறைவடைந்த பின்னர் அவருக்கு எதிராகச் சட்ட நடவடிக்கை எடுக்க நேரிடலாம் என்றும் தெரிவித்துள்ளார்.
