சைபர் குற்றவாளிகளால் நிதி அமைச்சிலிருந்து கைப்பற்றப்பட்ட 2.5 மில்லியன் அமெரிக்க டொலர்கள் தொடர்பில் முறையான விசாரணைகள் ஆரம்பிக்கப்பட்டுள்ளதாக பிரதமர் கலாநிதி ஹரிணி அமரசூரிய தெரிவித்தார்.
இன்று வெள்ளிக்கிழமை (24) காலை கண்டியில் நடைபெற்ற நிகழ்வொன்றின் போது ஊடகங்களுக்கு கருத்து தெரிவித்த பிரதமர், இச்சம்பவம் குறித்து விரிவான விசாரணைகள் நடைபெற்று வருவதாகவும், இதில் தொடர்புடையவர்களுக்கு எதிராக உரிய சட்ட நடவடிக்கை எடுக்கப்படும் எனவும் குறிப்பிட்டார்.
இந்த மோசடி தொடர்பான விசாரணைகளுக்கு சர்வதேச ரீதியான ஒத்துழைப்பு இலங்கைக்கு கிடைத்துள்ளதாக அவர் தெரிவித்தார். ஒரு அரசாங்கம் என்ற ரீதியில் இச்சம்பவம் தொடர்பாக எடுக்க வேண்டிய அனைத்து அவசியமான நடவடிக்கைகளையும் முன்னெடுப்பதாக அவர் உறுதியளித்தார்.
எதிர்க்கட்சியினரால் தனக்கு எதிராக கொண்டுவரப்படவுள்ளதாகக் கூறப்படும் நம்பிக்கையில்லா பிரேரணை குறித்தும் பிரதமர் இதன்போது கருத்து தெரிவித்தார்.
“எனக்கு எதிராக நம்பிக்கையில்லா பிரேரணையைக் கொண்டுவர முயற்சிக்கிறார்கள். அது பாராளுமன்றத்திற்கு வரும் வரை நான் காத்திருக்கிறேன்.
அதன் மூலம் அவர்களுக்குப் பதிலளிக்க எனக்கு ஒரு சந்தர்ப்பம் கிடைக்கும். ஒரு ஜனநாயக நாட்டில் எதிர்க்கட்சி என்பது அத்தியாவசியமானது.
அரசாங்கத்தின் தவறுகளைச் சுட்டிக்காட்டுவதும் மாற்று அரசியல் கருத்துக்களைப் பிரதிநிதித்துவப்படுத்துவதும் முக்கியமானது. ஆனால் தற்போதைய எதிர்க்கட்சி அதைத்தான் செய்கிறதா என்பதை மக்களே சிந்திக்க வேண்டும் என மேலும் தெரிவித்தார்.
