நுவரெலியா மாவட்டம், கொத்மலை பிரதேச செயலகப் பிரிவுக்குட்பட்ட 50 ஏக்கர் பகுதியில் அமைந்துள்ள பிரதான பாலம் மிகவும் மோசமான நிலையில் காணப்படுவதுடன், எந்த நேரத்திலும் இடிந்து விழக்கூடிய அபாயம் ஏற்பட்டுள்ளதாக அப்பகுதி மக்கள் தெரிவிக்கின்றனர்.
இந்தப் பாலத்தை 120க்கும் மேற்பட்ட குடும்பங்களைச் சேர்ந்த 800க்கும் அதிகமானோர் அன்றாட தேவைகளுக்காக பயன்படுத்தி வருகின்றனர். கடந்த புயலின் போது பாலம் சேதமடைந்ததாகவும், அதிகாரிகளிடம் பலமுறை அறிவித்தும் இதுவரை நிரந்தர தீர்வு வழங்கப்படவில்லை எனவும் மக்கள் தெரிவிக்கின்றனர்.
கடந்த மூன்று நாட்களாக பெய்து வரும் கடும் மழையால் பாலத்தின் நிலை மேலும் மோசமடைந்துள்ளதுடன், சில பகுதிகள் உடைந்து விழுந்துள்ளதாகவும் தெரிவிக்கப்படுகிறது. தற்போது பொதுமக்கள் தற்காலிகமாக மரப்பலகைகளைப் பயன்படுத்தி பாலத்தை கடந்து செல்ல வேண்டிய நிலை ஏற்பட்டுள்ளது.
கர்ப்பிணித் தாய்மார்கள், பாடசாலை மாணவர்கள், வயோதிபர்கள் மற்றும் அவசர சிகிச்சை தேவைப்படும் நோயாளிகள் இதனால் கடுமையான சிரமங்களை எதிர்கொள்வதாக மக்கள் கூறுகின்றனர்.
எனவே, விபத்துகள் ஏற்பட்டு உயிரிழப்புகள் நிகழும் முன்னர் அதிகாரிகள் உடனடியாக பாலத்தை தொழில்நுட்ப ரீதியாக ஆய்வு செய்து, அவசர பாதுகாப்பு நடவடிக்கைகளை மேற்கொள்ள வேண்டும் என மக்கள் கோரிக்கை விடுத்துள்ளனர்.
நுவரெலியா நிருபர்
