ஊடகவியலாளர் பிரகீத் எக்னெலிகொடவின் மனைவி சந்தியா எக்னெலிகொடவுக்கு எதிராக முன்னெடுக்கப்படும் அவதூறு மற்றும் வெறுப்புப் பிரசாரங்களைக் கண்டித்துள்ள இலங்கை ஊடக அமைப்புகள், அவரது பாதுகாப்பை உறுதிப்படுத்துமாறு அதிகாரிகளிடம் கோரிக்கை விடுத்துள்ளன.
கலகொட அத்தே ஞானசார தேரர் மீண்டும் சிறைக்குத் திரும்பியதைத் தொடர்ந்து, சந்தியா எக்னெலிகொடவுக்கு எதிரான பிரசாரங்கள் தீவிரமடைந்துள்ளதாக சுதந்திர ஊடக இயக்கம் உள்ளிட்ட ஆறு ஊடக அமைப்புகள் வெளியிட்ட கூட்டறிக்கையில் தெரிவிக்கப்பட்டுள்ளது.
நீதியை நாடும் ஒருவருக்கு எதிராக அச்சுறுத்தல்களையும் வன்முறையையும் தூண்டும் வகையிலான நடவடிக்கைகள் ஜனநாயகத்திற்கும் சட்டத்தின் ஆட்சிக்கும் முரணானவை எனக் குறிப்பிட்டுள்ள ஊடக அமைப்புகள், சந்தியா எக்னெலிகொடவின் பாதுகாப்பையும் கண்ணியத்தையும் உறுதிப்படுத்த அதிகாரிகள் உடனடியாக நடவடிக்கை எடுக்க வேண்டும் என வலியுறுத்தியுள்ளன.
