பொதுபல சேனா அமைப்பின் பொதுச் செயலாளர் கலகொடஅத்தே ஞானசார தேரரை விடுதலை செய்யக் கோரி, கொழும்பு விகாரமகாதேவி பூங்காவில் பௌத்த பிக்குகள் முன்னெடுத்து வரும் சத்தியாக்கிரகப் போராட்டம் இன்று (19) நான்காவது நாளாகவும் தொடர்கிறது.
கடந்த 16ஆம் திகதி ஆரம்பிக்கப்பட்ட இந்தப் போராட்டத்தின்போது, தற்காலிகக் கொட்டகை அமைக்க முயற்சித்த வேளையில் பிக்குகளுக்கும் பொலிஸாருக்கும் இடையில் பதற்றமான சூழ்நிலை ஏற்பட்டிருந்தது.
ஞானசார தேரர் விடுதலை செய்யப்படும் வரை போராட்ட இடத்திலிருந்து வெளியேறப் போவதில்லை எனப் போராட்டத்தில் ஈடுபட்டுள்ள பிக்குகள் தெரிவித்துள்ளனர்.
முன்னதாக, ஜனாதிபதி செயலகத்திற்கு முன்பாக ஒன்றுகூடிய பிக்குகள், பின்னர் புத்தசாசன அமைச்சுக்குச் சென்று அமைச்சின் செயலாளருடன் பேச்சுவார்த்தை நடத்தியிருந்தனர்.
எனினும், குறித்த பேச்சுவார்த்தை தோல்வியடைந்ததாகத் தெரிவித்த பிக்குகள், தமது கோரிக்கைகளுக்குத் தீர்வு கிடைக்கும் வரை விகாரமகாதேவி பூங்காவில் சத்தியாக்கிரகப் போராட்டத்தைத் தொடர்ந்து முன்னெடுக்கப் போவதாக அறிவித்துள்ளனர்.
