கிரிக்கெட்: ஜஸ்பிரித் பும்ராவைத் தேர்ந்தெடுத்துப் பயன்படுத்த வேண்டும் – ரவி சாஸ்திரி

இந்திய அணியின் முன்னாள் தலைமைப் பயிற்றுவிப்பாளர் ரவி சாஸ்திரி, வேகப்பந்து வீச்சாளர் ஜஸ்பிரித் பும்ராவை ஒருநாள் மற்றும் இருபதுக்கு 20 போட்டிகளில் அளவோடு பயன்படுத்த வேண்டும் என அறிவுறுத்தியுள்ளார்.

2027ஆம் ஆண்டு நடைபெறவுள்ள ஒருநாள் உலகக் கிண்ணப் போட்டியை முன்னிட்டு, பும்ராவின் உடற்தகுதியையும் நீண்டகாலப் பங்களிப்பையும் கருத்திற்கொண்டு அவருக்கான போட்டிச் சுமையை நிர்வகிப்பது அவசியம் என அவர் குறிப்பிட்டுள்ளார்.

முதுகுப் பகுதியில் ஏற்பட்ட காயம் மற்றும் அதற்காக 2023ஆம் ஆண்டு மேற்கொள்ளப்பட்ட அறுவைச் சிகிச்சை உள்ளிட்ட கடந்தகால உடல்நலப் பிரச்சினைகளைக் கருத்திற்கொண்டு, அவரை மூன்று வகையான சர்வதேசப் போட்டிகளிலும் தொடர்ச்சியாகப் பயன்படுத்துவது பொருத்தமானதல்ல என்பது சாஸ்திரியின் கருத்தாகும்.

இந்திய அணியின் முக்கியமான டெஸ்ட் போட்டிகளில் பும்ராவின் பங்களிப்பைப் பாதுகாப்பதற்காகத் தேர்ந்தெடுக்கப்பட்ட போட்டிகளில் அவரைப் பயன்படுத்துவது அவசியம் எனவும் அவர் தெரிவித்துள்ளார்.

2027ஆம் ஆண்டு ஒருநாள் உலகக் கிண்ணப் போட்டிகள் தென்னாப்பிரிக்கா, சிம்பாப்வே மற்றும் நமீபியாவில் ஒக்டோபர் 2 முதல் நவம்பர் 21 வரை நடைபெறத் திட்டமிடப்பட்டுள்ளன.