பொலன்னறுவை, கலஹாக்கலை பகுதியில் வனவளத் திணைக்களத்துக்குச் சொந்தமான சுமார் 15 ஹெக்டேயர் நிலப்பரப்பில் புதிய யானைகள் காப்பகம் ஒன்றை அமைக்கத் தீர்மானிக்கப்பட்டுள்ளதாகப் பொலன்னறுவை மாவட்டச் செயலாளர் சுஜந்த ஏக்கநாயக்க தெரிவித்துள்ளார்.
மனித – யானை மோதல்கள், வெள்ளப்பெருக்கு, ரயில் விபத்துகள் உள்ளிட்ட பல்வேறு அனர்த்தங்களால் தாயைப் பிரிந்த அல்லது காயமடைந்த யானைக்குட்டிகளின் உயிரைப் பாதுகாப்பதே இத்திட்டத்தின் முக்கிய நோக்கமாகும்.
கால்நடை மருத்துவர்கள், வனவளத் திணைக்கள அதிகாரிகள் மற்றும் மக்கள் பிரதிநிதிகள் அடங்கிய நிபுணர் குழுவின் ஆய்வுக்குப் பின்னர், கலஹாக்கலை பகுதி இக்காப்பகத்தை அமைப்பதற்காகத் தெரிவு செய்யப்பட்டுள்ளது.
தற்போது இலங்கையில் உடவளவை பகுதியில் மட்டுமே யானைகள் காப்பகம் இயங்கி வருவதாகத் தெரிவிக்கப்படுகிறது. வடக்கு மற்றும் வடமத்திய மாகாணங்களில் காயமடைந்த யானைக்குட்டிகளை உடவளவைக்கு எடுத்துச் செல்வதற்கு 7 முதல் 9 மணித்தியாலங்கள் வரை தேவைப்படுவதால், நீண்ட தூரப் பயணம் அவற்றின் உயிருக்கு அச்சுறுத்தலாக அமைகிறது.
இந்தப் புதிய காப்பகம் அமைக்கப்படுவதன் மூலம், காயமடைந்த மற்றும் தாயைப் பிரிந்த யானைக்குட்டிகளுக்கு விரைவாகச் சிகிச்சை அளித்து, அவற்றைப் பராமரிப்பதற்கான வசதிகள் மேம்படும் என எதிர்பார்க்கப்படுகிறது.
அத்துடன், இத்திட்டத்தின் மூலம் பொலன்னறுவை மாவட்டத்தின் சுற்றுலாத்துறை ஊக்கமடைவதுடன், யானைக்குட்டிகளுக்கான உணவுப் பொருட்களை வழங்குதல் உள்ளிட்ட சேவைகள் ஊடாக உள்ளூர் மக்களுக்குப் புதிய வேலைவாய்ப்புகளும் உருவாகும் என மாவட்டச் செயலாளர் மேலும் தெரிவித்துள்ளார்.
