இலங்கையில் நுகர்வோர் பாதுகாப்புச் சட்டங்களை மீறிய சுமார் 200 வர்த்தகர்களுக்கு எதிராகச் சட்ட நடவடிக்கை எடுக்கப்பட்டுள்ளதாக நுகர்வோர் விவகார அதிகாரசபை (CAA) தெரிவித்துள்ளது.
கடந்த ஒக்டோபர் 20ஆம் திகதி முதல் 24ஆம் திகதி வரையான காலப்பகுதியில் முன்னெடுக்கப்பட்ட விசேட திடீர் சோதனைகளின்போதே இந்த நடவடிக்கை எடுக்கப்பட்டுள்ளது.
பொருட்களின் விலைகளைத் தெளிவாகக் காட்சிப்படுத்தத் தவறிய வர்த்தக நிலையங்கள் மற்றும் நுகர்வோர் பாதுகாப்பு விதிமுறைகளை மீறிச் செயற்பட்ட வணிக நிறுவனங்களைக் குறிவைத்து இந்தச் சோதனைகள் நடத்தப்பட்டன.
சந்தையில் விலை வெளிப்படைத்தன்மையை உறுதிப்படுத்துவதுடன், நுகர்வோர் நியாயமான விலையில் பொருட்களைக் கொள்வனவு செய்வதை உறுதிப்படுத்தும் நோக்கிலும் இந்த நடவடிக்கைகள் முன்னெடுக்கப்பட்டுள்ளன.
இதன்போது அரிசி, சீனி, பருப்பு, காய்கறிகள், பழங்கள், கோதுமை மா, பேக்கரி உற்பத்திகள், சிற்றுண்டிகள், ஆடைகள், மின்சாதனங்கள் மற்றும் கைப்பேசிப் பாகங்கள் உள்ளிட்ட பல்வேறு பொருட்கள் சோதனைக்கு உட்படுத்தப்பட்டன.
காலி, மாத்தறை, அம்பாந்தோட்டை, யாழ்ப்பாணம், அம்பாறை, மட்டக்களப்பு, அனுராதபுரம், குருநாகல், புத்தளம், கண்டி, மாத்தளை, கேகாலை, இரத்தினபுரி, மொணராகலை, திருகோணமலை, மன்னார், முல்லைத்தீவு மற்றும் வவுனியா உள்ளிட்ட பல மாவட்டங்களில் இந்தக் கண்காணிப்பு நடவடிக்கைகள் மேற்கொள்ளப்பட்டன.
மேலும், கோதுமை மாவின் சந்தை இருப்பு மற்றும் விற்பனைத் தரங்கள் தொடர்பிலும் விசேட ஆய்வுகள் நடத்தப்பட்டதாக அதிகாரசபை தெரிவித்துள்ளது.
நுகர்வோர் பாதுகாப்புச் சட்டங்களை மீறிய வர்த்தகர்களுக்கு எதிராக உரிய நீதவான் நீதிமன்றங்களில் வழக்குகள் தாக்கல் செய்யப்பட்டுள்ளன.
நுகர்வோர் உரிமைகளைப் பாதுகாப்பதற்காகவும், சந்தையில் நியாயமான வணிக நடைமுறைகளை உறுதிப்படுத்துவதற்காகவும் சட்டங்களை மீறும் வர்த்தகர்களுக்கு எதிராகத் தொடர்ந்து கடுமையான நடவடிக்கைகள் எடுக்கப்படும் என நுகர்வோர் விவகார அதிகாரசபை மேலும் எச்சரித்துள்ளது.
