ஹெவலோக் சிட்டி சொகுசு அடுக்குமாடி குடியிருப்பில் தங்க முலாம் பூசப்பட்ட டி-56 ரக துப்பாக்கி மீட்கப்பட்ட சம்பவம் தொடர்பாக முன்னாள் அமைச்சர் துமிந்த திஸாநாயக்கவுக்கு எதிராக சட்டமா அதிபரால் கொழும்பு மேல் நீதிமன்றத்தில் நேற்று (05) குற்றப்பத்திரிகை தாக்கல் செய்யப்பட்டுள்ளது.
இதே வழக்கில் மற்றொரு சந்தேகநபரான ஐகுல் ஜெரக்ஷினாவுக்கும் எதிராக சட்டமா அதிபர் குற்றப்பத்திரிகை தாக்கல் செய்துள்ளார்.
கடந்த மே மாதம் 23 ஆம் திகதி இந்தச் சம்பவம் தொடர்பில் துமிந்த திஸாநாயக்க கைது செய்யப்பட்டு கல்கிஸ்ஸை நீதவான் நீதிமன்றில் ஆஜர்படுத்தப்பட்டதைத் தொடர்ந்து விளக்கமறியலில் வைக்கப்பட்டார்.
பின்னர், அவரை நேரடியாக அல்லது மறைமுகமாக சம்பவத்துடன் தொடர்புபடுத்த போதிய ஆதாரங்கள் இல்லை எனக் கருதி பிணையில் விடுவிக்கப்பட்டிருந்த நிலையில், மேலதிக விசாரணைகளில் கிடைத்த சாட்சிகளின் அடிப்படையில் அவரை சந்தேகநபராக பெயரிடுவதற்கு போதுமான ஆதாரங்கள் உள்ளதாக சட்டமா அதிபர் ஆலோசனை வழங்கியிருந்தார்.
அதனையடுத்து முன்னெடுக்கப்பட்ட விசாரணைகளின் அடிப்படையில், துமிந்த திஸாநாயக்கவுக்கு எதிராக கொழும்பு மேல் நீதிமன்றத்தில் குற்றப்பத்திரிகை தாக்கல் செய்யப்பட்டுள்ளதாக தெரிவிக்கப்பட்டுள்ளது.
