கொட்டாஞ்சேனை பகுதியில் நபரொருவர் வெட்டிக் கொலை செய்யப்பட்ட சம்பவத்துடன் தொடர்புடைய பிரதான சந்தேக நபர்கள் இருவர் மற்றும் அதற்கு உடந்தையாக இருந்த ஒருவர் ஐஸ் போதைப்பொருளுடன் பொலிஸாரால் கைது செய்யப்பட்டுள்ளனர்.
கடந்த 14ஆம் திகதி கொட்டாஞ்சேனையில் இடம்பெற்ற இக்கொலைச் சம்பவம் தொடர்பில் பொலிஸார் மேற்கொண்ட தீவிர விசாரணைகளின் அடிப்படையில் இந்த கைது நடவடிக்கை முன்னெடுக்கப்பட்டது.
பொலிஸாருக்கு கிடைத்த இரகசியத் தகவல்களுக்கு அமைய கிராண்ட்பாஸ், கொலன்னாவை மற்றும் மட்டக்குளி ஆகிய பகுதிகளில் நடத்தப்பட்ட விசேட சோதனைகளின்போதே இந்த 3 சந்தேக நபர்களும் கைது செய்யப்பட்டனர்.
கைதான சந்தேக நபர்களிடமிருந்து 28 கிராம் 600 மில்லிகிராம் ஐஸ் போதைப்பொருள் மற்றும் கொலைக்கு பயன்படுத்தப்பட்ட கத்தி என்பன பொலிஸாரால் கைப்பற்றப்பட்டுள்ளன.
மட்டக்குளி, கொழும்பு 14 மற்றும் கொலன்னாவை ஆகிய பகுதிகளைச் சேர்ந்த 19, 25 மற்றும் 39 வயதுடைய நபர்களே கைது செய்யப்பட்டுள்ளனர்.
இச்சம்பவம் தொடர்பில் கொட்டாஞ்சேனை பொலிஸார் மேலதிக தீவிர விசாரணைகளில் ஈடுபட்டு வருகின்றனர்.
