இந்த வருடத்தில் இதுவரை 891 சட்டவிரோத துப்பாக்கிகள் பொலிஸாரின் கட்டுப்பாட்டுக்குள் கொண்டுவரப்பட்டுள்ளதாக அமைச்சரவைப் பேச்சாளர் நளிந்த ஜயதிஸ்ஸ தெரிவித்துள்ளார்.
அமைச்சரவைத் தீர்மானங்களை அறிவிக்கும் ஊடகவியலாளர் சந்திப்பில் கருத்து தெரிவிக்கும் போதே அவர் இதனைத் தெரிவித்துள்ளார்.
ஜனவரி முதலாம் திகதி முதல் செப்டெம்பர் 17 ஆம் திகதி வரையான காலப்பகுதியில், டி-56 ரகத்தை சேர்ந்த 14 துப்பாக்கிகளும், 33 கைத்துப்பாக்கிகளும் 25 ரிவோல்வர்களும் அடங்கலாக மொத்தம் 891 துப்பாக்கிகள் பொலிஸாரினால் கைப்பற்றப்பட்டுள்ளதாக அமைச்சர் குறிப்பிட்டுள்ளார்.
இதேவேளை, கடந்த ஆண்டு மேற்கொள்ளப்பட்ட நடவடிக்கைகளின் போது டி-56 ரகத்தை சேர்ந்த 74 துப்பாக்கிகள் உள்ளிட்ட மொத்தம் 2,404 ஆயுதங்கள் கைப்பற்றப்பட்டதாகவும் அவர் தெரிவித்துள்ளார்.
இந்த ஆண்டு ஆரம்பம் முதல் இதுவரை 35 திட்டமிடப்பட்ட துப்பாக்கிச் சூட்டுச் சம்பவங்கள் உட்பட மொத்தம் 40 துப்பாக்கிச் சூட்டுச் சம்பவங்கள் பதிவாகியுள்ளதாகவும் அமைச்சர் தெரிவித்துள்ளார்.
இந்த துப்பாக்கிச் சூட்டுச் சம்பவங்களில் 22 பேர் உயிரிழந்துள்ளதாகவும் அமைச்சர் நளிந்த ஜயதிஸ்ஸ குறிப்பிட்டுள்ளார்.
