மலையக மக்களை இழிவுபடுத்தும் கருத்துகளுக்கு ஜீவன் தொண்டமான் கண்டனம்

மலையகத் தமிழ் மக்களை இழிவுபடுத்தும் வகையில் சமூக வலைத்தளங்களில் வெளியிடப்படும் கருத்துகளுக்கு எதிராக சட்ட நடவடிக்கை எடுக்கப்பட வேண்டும் என இலங்கை தொழிலாளர் காங்கிரஸின் பொதுச்செயலாளரும் நாடாளுமன்ற உறுப்பினருமான ஜீவன் தொண்டமான் தெரிவித்துள்ளார்.

நாடாளுமன்றத்தில் இன்று (08) உரையாற்றிய அவர், தேசிய பாடசாலை ஆசிரியர் ஒருவர் மலையக மக்களை அவமதிக்கும் வகையில் கருத்து வெளியிட்டமை தொடர்பில் காவல்துறையில் முறைப்பாடு செய்துள்ளதாக தெரிவித்தார்.

மலையக மக்கள் இலங்கையின் பொருளாதார வளர்ச்சிக்கு நீண்டகாலமாக ஆற்றிய பங்களிப்பை சுட்டிக்காட்டிய அவர், ‘கள்ளத்தோணி’ உள்ளிட்ட அவமதிப்பான சொற்களை பயன்படுத்துவது ஏற்றுக்கொள்ள முடியாதது எனவும் குறிப்பிட்டார்.

இனம், மதம் அல்லது சமூகப் பின்னணி அடிப்படையில் எந்தவொரு சமூகத்தையும் இழிவுபடுத்தக் கூடாது என வலியுறுத்திய ஜீவன் தொண்டமான், நாட்டில் வாழும் அனைத்து மக்களுக்கும் சமமான உரிமையும் மரியாதையும் கிடைக்க வேண்டும் எனவும் தெரிவித்துள்ளார்.