முன்னாள் கொழும்பு பிரதம நீதிவானும், மொரட்டுவை மாவட்ட நீதிபதியுமான திலின கமகேவை நீதித்துறை சேவையிலிருந்து நிரந்தரமாகப் பணிநீக்கம் செய்ய நீதிச்சேவை ஆணைக்குழு தீர்மானித்துள்ளது.

சட்டவிரோதமாக யானைக்குட்டி ஒன்றை வைத்திருந்ததாக முன்வைக்கப்பட்ட குற்றச்சாட்டுகள் தொடர்பில் நடத்தப்பட்ட ஒழுக்காற்று விசாரணையில், அவர் மீதான அனைத்து குற்றச்சாட்டுகளும் நிரூபிக்கப்பட்டதைத் தொடர்ந்து இந்தத் தீர்மானம் எடுக்கப்பட்டுள்ளது.

‘சக்குரா’ யானைக்குட்டி தொடர்பான சர்ச்சை

போலி ஆவணங்கள் மூலம் பெறப்பட்ட அனுமதியைப் பயன்படுத்தி ‘சக்குரா’ எனப் பெயரிடப்பட்ட யானைக்குட்டியைச் சட்டவிரோதமாக வைத்திருந்ததாக திலின கமகே மீது குற்றச்சாட்டு முன்வைக்கப்பட்டது.

2015ஆம் ஆண்டு மே மாதம் குற்றப்புலனாய்வுத் திணைக்களம் மேற்கொண்ட விசாரணைகளைத் தொடர்ந்து, அவரிடம் இருந்த யானைக்குட்டி வனஜீவராசிகள் பாதுகாப்புத் திணைக்களத்திடம் ஒப்படைக்கப்பட்டது.

முன்னதாகவும் பணி இடைநீக்கம்

இந்த விவகாரம் தொடர்பில், 2016ஆம் ஆண்டு கொழும்பு மேலதிக நீதிவானாகப் பணியாற்றிய காலத்தில் நீதிச்சேவை ஆணைக்குழுவினால் அவர் முதன்முறையாகப் பணி இடைநீக்கம் செய்யப்பட்டார்.

பின்னர், 2019ஆம் ஆண்டு நவம்பர் 7ஆம் திகதி, திலின கமகே உள்ளிட்ட நால்வருக்கு எதிராகக் கொழும்பு மேல் நீதிமன்றத்தில் குற்றப்பத்திரிகை தாக்கல் செய்யப்பட்டது.

எனினும், போதுமான சாட்சியங்கள் இல்லை எனக் குறிப்பிட்டு, 2021ஆம் ஆண்டு டிசம்பர் 16ஆம் திகதி சட்டமா அதிபர் திணைக்களம் திலின கமகே மீதான குற்றச்சாட்டுகளை மீளப் பெற்றுக்கொண்டது.

2025ஆம் ஆண்டு மீண்டும் ஒழுக்காற்று நடவடிக்கை

இதற்கிடையில், 2025ஆம் ஆண்டு ஜூன் மற்றும் ஆகஸ்ட் மாதங்களில் நீதிச்சேவை ஆணைக்குழுவினால் அவருக்கு எதிராக மீண்டும் குற்றப்பத்திரிகைகள் தாக்கல் செய்யப்பட்டன. இதனைத் தொடர்ந்து, 2025ஆம் ஆண்டு ஆகஸ்ட் 1ஆம் திகதி அவர் மொரட்டுவை மாவட்ட நீதிபதி பதவியிலிருந்து மீண்டும் பணி இடைநீக்கம் செய்யப்பட்டார்.

இந்நிலையில், இன்று (9) வெள்ளிக்கிழமை இடம்பெற்ற ஒழுக்காற்று விசாரணையின் முடிவில், அவர் மீதான அனைத்து குற்றச்சாட்டுகளும் நிரூபிக்கப்பட்டதாகத் தெரிவிக்கப்பட்டுள்ளது. இதனையடுத்து, திலின கமகேவை நீதித்துறை சேவையிலிருந்து நிரந்தரமாகப் பணிநீக்கம் செய்ய நீதிச்சேவை ஆணைக்குழு தீர்மானித்துள்ளது.