2028 முதல் 2034ஆம் ஆண்டு வரையிலான ஏழு ஆண்டுகளுக்கான ஐரோப்பிய ஒன்றியத்தின் (EU) வரவுசெலவுத் திட்டத்தைத் திருத்தி அமைப்பதற்கான புதிய முன்மொழிவு முன்வைக்கப்பட்டுள்ளது.
இதன்படி, ஐரோப்பிய ஆணைக்குழு ஆரம்பத்தில் முன்வைத்த 2 டிரில்லியன் யூரோ வரவுசெலவுத் திட்டத்தை 1.6 டிரில்லியன் யூரோவாகக் குறைப்பது தொடர்பில் முன்மொழியப்பட்டுள்ளதாக வெளிநாட்டு ஊடகங்கள் செய்தி வெளியிட்டுள்ளன.
எனினும், செலவினங்களைக் கட்டுப்படுத்துவதில் அதிக கவனம் செலுத்தும் சில உறுப்பு நாடுகள் இந்தக் குறைப்பு போதுமானதல்ல என விமர்சித்துள்ளன.
முன்மொழியப்பட்டுள்ள புதிய வரவுசெலவுத் திட்டம், 2021–2027 காலப்பகுதிக்கான தற்போதைய திட்டத்தை விட சுமார் 30 சதவீதம் அதிகமாக இருக்கும் எனத் தெரிவிக்கப்படுகிறது.
ஐரோப்பிய ஒன்றியத்தின் 27 உறுப்பு நாடுகளின் முக்கிய கொள்கைகள், அபிவிருத்தித் திட்டங்கள் மற்றும் பல்வேறு நடவடிக்கைகளுக்கு நிதியளிப்பதில் இந்த வரவுசெலவுத் திட்டம் முக்கிய பங்கு வகிக்கிறது.
பணவீக்கத்தைக் கருத்தில் கொண்டு கணக்கிடப்பட்ட தொகைகளின் அடிப்படையில் இந்தக் குறைப்பு முன்மொழியப்பட்டுள்ளதாகவும் தெரிவிக்கப்பட்டுள்ளது. இந்த வரவுசெலவுத் திட்டம் தொடர்பான இறுதி முடிவு உறுப்பு நாடுகளுக்கிடையிலான பேச்சுவார்த்தைகளின் பின்னரே எடுக்கப்படும்.
