இந்தியாவின் லடாக் பிராந்தியத்தில் சுமார் 3,350 கோடி ரூபாய் மதிப்பிலான ஐந்து முக்கிய அபிவிருத்தித் திட்டங்களை இன்று ஒக்டோபர் 15ஆம் திகதி இந்தியப் பிரதமர் நரேந்திர மோடி ஆரம்பித்து வைக்கவும் நாட்டுக்கு அர்ப்பணிக்கவும் உள்ளதாக இந்திய ஊடகங்கள் தெரிவிக்கின்றன.
இந்தத் திட்டங்களில் விமான நிலைய உட்கட்டமைப்பு, மூலோபாய வீதிப் போக்குவரத்து, நீர்மின் உற்பத்தி, மின்சாரக் கட்டமைப்பு மற்றும் பாரம்பரியப் பாதுகாப்பு ஆகியவை அடங்குகின்றன.
லே பகுதியில் அமைந்துள்ள குஷோக் பகுலா ரின்போச்சி விமான நிலையத்தின் புதிய பயணிகள் முனையக் கட்டடம் முக்கிய திட்டங்களில் ஒன்றாகும். சுமார் 640 கோடி ரூபாய் செலவில் அமைக்கப்பட்டுள்ள இந்த முனையம், ஆண்டுக்கு 35 இலட்சம் பயணிகளைக் கையாளும் வகையில் வடிவமைக்கப்பட்டுள்ளது.
மேலும், 298 கிலோமீற்றர் நீளமான நிம்மு–பதம்–தார்ச்சா வீதியும் நாட்டுக்கு அர்ப்பணிக்கப்படவுள்ளது. லடாக்குக்கான மாற்றுப் போக்குவரத்துப் பாதையை வழங்கும் இந்த வீதி, பிராந்திய இணைப்பையும் இராணுவத் தளவாட நகர்வுகளையும் வலுப்படுத்தும் என எதிர்பார்க்கப்படுகிறது.
இதனுடன், 9 மெகாவாட் திறன் கொண்ட சிறிய நீர்மின் திட்டம், மின்சாரப் பரிமாற்றக் கட்டமைப்பு, லடாக்கின் பழமையான பாறைச் செதுக்கல்களைப் பாதுகாக்கும் பூங்கா மற்றும் 40 கிராமங்களில் உருவாக்கப்பட்ட நீர்நிலைகள் ஆகியவையும் திட்டத் தொகுப்பில் இடம்பெற்றுள்ளன.
இந்தத் திட்டங்கள் பிராந்தியத்தின் போக்குவரத்து, மின்சாரம், நீர் பாதுகாப்பு மற்றும் சுற்றுலா வளர்ச்சிக்கு உதவும் என எதிர்பார்க்கப்படுகிறது.
