மட்டக்களப்பில் சட்டவிரோத சுருக்கு வலை மீன்பிடியைத் தடை செய்யுமாறும், அதற்கு உடந்தையாக இருப்பதாகக் குற்றஞ்சாட்டப்படும் உத்தியோகத்தரை உடனடியாக இடமாற்றம் செய்யுமாறும் கோரி, மீனவர்கள் இன்று வெள்ளிக்கிழமை (16) ஆர்ப்பாட்டத்தில் ஈடுபட்டனர்.
மட்டக்களப்பு இலஞ்ச ஒழிப்பு மற்றும் போதைப்பொருளுக்கு எதிரான அமைப்பின் ஏற்பாட்டில், காலை 9 மணியளவில் கல்லடியில் அமைந்துள்ள மாவட்ட கடற்றொழில் நீரியல் வள திணைக்களத்திற்கு முன்பாக இந்தப் போராட்டம் நடைபெற்றது. இதில் மீனவர்கள், மீனவ சங்கப் பிரதிநிதிகள் மற்றும் மாதர் சங்க உறுப்பினர்கள் உள்ளிட்ட நூற்றுக்கும் மேற்பட்டோர் கலந்துகொண்டனர்.
இதன்போது, சட்டவிரோத சுருக்கு வலை மீன்பிடியைத் தடை செய்ய வேண்டும், மட்டக்களப்பின் கடல்வளத்தைப் பாதுகாக்க வேண்டும், இலஞ்சம் பெறுவதாகக் குற்றஞ்சாட்டப்படும் உத்தியோகத்தர்களைப் பணி இடைநீக்கம் செய்ய வேண்டும் உள்ளிட்ட கோரிக்கைகளை முன்வைத்து ஆர்ப்பாட்டக்காரர்கள் கோஷங்களை எழுப்பினர்.
மேலும், காத்தான்குடி பாலமுனை மற்றும் பூநொச்சிமுனை பகுதிகளில் சட்டவிரோத சுருக்கு வலை மீன்பிடியில் ஈடுபடுவதாகக் கூறப்படும் வெளிமாவட்டத் தொழிலாளர்களை வெளியேற்ற வேண்டும் என்றும் அவர்கள் வலியுறுத்தினர்.
ஆர்ப்பாட்டத்தின் நிறைவில், மாவட்ட கடற்றொழில் நீரியல் வள திணைக்களப் பணிப்பாளரிடம் மகஜர் ஒன்று கையளிக்கப்பட்டது. அதனைத் தொடர்ந்து, காலை 11 மணியளவில் ஆர்ப்பாட்டக்காரர்கள் அங்கிருந்து கலைந்து சென்றனர்.
