காவன்திஸ்ஸ யானை மீது துப்பாக்கிச் சூடு நடத்திய சம்பவம் மற்றும் அதனுடன் தொடர்புடைய சட்டவிரோதச் செயற்பாடுகள் தொடர்பில் மேலும் ஐந்து சந்தேகநபர்கள் கைது செய்யப்பட்டுள்ளனர்.
வனவிலங்கு பாதுகாப்புத் திணைக்களம், பாணந்துறை – வலான மத்திய ஊழல் தடுப்புப் பிரிவு மற்றும் பொலிஸார் இணைந்து முன்னெடுத்த விசேட தேடுதல் நடவடிக்கையின்போதே இவர்கள் கைது செய்யப்பட்டுள்ளதாக சுற்றாடல் அமைச்சு தெரிவித்துள்ளது.
முன்னதாகக் கைது செய்யப்பட்ட பிரதான சந்தேகநபர், யானை மீது துப்பாக்கிச் சூடு நடத்திய சம்பவத்தில் நேரடியாகத் தொடர்புபட்டுள்ளமை விசாரணைகளில் தெரியவந்துள்ளதாக அமைச்சு குறிப்பிட்டுள்ளது.
மேலும் கைது செய்யப்பட்ட ஐவரும் அப்பகுதியில் இடம்பெறும் ஏனைய சட்டவிரோதச் செயற்பாடுகளுடன் தொடர்புடையவர்களாக இருக்கலாம் எனச் சந்தேகிக்கப்படுகிறது.
கைது செய்யப்பட்டவர்களிடம் வனவிலங்கு அதிகாரிகள் மற்றும் கல்கமுவ பொலிஸார் இணைந்து விசாரணைகளை முன்னெடுத்து வருகின்றனர்.
யானை மீது துப்பாக்கிச் சூடு நடத்தப் பயன்படுத்தப்பட்ட ஆயுதங்கள் எங்கிருந்து பெறப்பட்டன, வனவிலங்குகளைக் குறிவைத்து ஒழுங்கமைக்கப்பட்ட சட்டவிரோதக் குழுவொன்று செயற்பட்டதா என்பது குறித்தும் விசாரணைகள் விரிவுபடுத்தப்பட்டுள்ளதாக சுற்றாடல் அமைச்சு மேலும் தெரிவித்துள்ளது.
