இலங்கையின் நுவரெலியா மாவட்டம், பூண்டுலோயாவைச் சேர்ந்த ராஜமாணிக்கம் சத்தியமூர்த்தி, 2026 ஆம் ஆண்டுக்கான ஆபிரிக்கா வர்த்தக மன்றம் மற்றும் விருதுகள் நிகழ்வில் (Africa Business Forum and Awards 2026), “சிறந்த வர்த்தகத் தலைவர் – ஆடை மற்றும் ஆடை உற்பத்தித் துறை” (Best Business Leader – Textile and Garment Manufacturing) என்ற விருதைப் பெற்றுக்கொண்டார்.
2026 ஒக்டோபர் 17 ஆம் திகதி, கானா நாட்டின் தலைநகரான அக்கிராவில் அமைந்துள்ள கெம்பின்ஸ்கி ஹோட்டலில் (Kempinski Hotel, Accra, Ghana) நடைபெற்ற இந்நிகழ்வில், ஆபிரிக்கக் கண்டத்தின் 40 நாடுகளைச் சேர்ந்த பிரதிநிதிகள் பங்கேற்றனர். இந்நிகழ்வை UNIQUE Communications நிறுவனம் ஏற்பாடு செய்திருந்தது.
டோகோ நாட்டின் Star Garments Togo SARL நிறுவனத்தின் நிறைவேற்றுப் பணிப்பாளராக (Executive Director) பணியாற்றும் ராஜமாணிக்கம் சத்தியமூர்த்தி, டோகோ நாட்டின் சார்பில் ஒரே பிரதிநிதியாக இவ்விருதைப் பெற்றுக்கொண்டமை குறிப்பிடத்தக்கது.
இவர் இலங்கைத் திருநாட்டின் நுவரெலியா மாவட்டத்தில், பூண்டுலோயா ஹொரே கீழ்ப்பிரிவைச் சேர்ந்த திரு, திருமதி ராஜமாணிக்கம் தம்பதியினரின் அன்பு மகனாவார். பூண்டுலோயா தமிழ் மகா வித்தியாலயத்தில் கல்வி கற்ற இவர், இன்று சர்வதேச அரங்கில் தனது தொழில்சார் சாதனையின் மூலம் இலங்கைக்கும், தனது சொந்த ஊருக்கும் பெருமை சேர்த்துள்ளார்.
தனது திறமை, உழைப்பு மற்றும் தொழில்துறை அனுபவத்தின் மூலம் சர்வதேச அங்கீகாரத்தைப் பெற்றுள்ள ராஜமாணிக்கம் சத்தியமூர்த்தியின் சாதனை, இளைய தலைமுறையினருக்கும் தொழில்முனைவோருக்கும் ஊக்கமளிக்கும் ஒன்றாக அமைந்துள்ளது.
