முன்னாள் அமைச்சர் டக்ளஸ் தேவானந்தாவின் அலுவலகத்தில் சி.ஐ.டி சோதனை!
யாழ்ப்பாணத்தில் அமைந்துள்ள முன்னாள் அமைச்சர் டக்ளஸ் தேவானந்தாவின் அலுவலகத்தில் குற்றப் புலனாய்வுத் திணைக்களத்தினர் இன்று தீவிர தேடுதல் நடவடிக்கையில் ஈடுபட்டுள்ளனர்.
யாழ்ப்பாணம் ஸ்ரான்லி வீதியில் அமைந்துள்ள அவரது அலுவலகம் மற்றும் அதனைச் சூழவுள்ள வளாகத்தில் இந்தச் சோதனை முன்னெடுக்கப்பட்டுள்ளது.
குற்றப் புலனாய்வுத் திணைக்களத்துக்குக் கிடைத்ததாகக் கூறப்படும் தகவலின் அடிப்படையில், யாழ்ப்பாணம் நீதிமன்றத்தில் தேடுதல் ஆணையைப் பெற்று இந்த நடவடிக்கை மேற்கொள்ளப்பட்டதாக அதிகாரிகள் தெரிவித்துள்ளனர்.
இதன்போது, ஸ்ரான்லி வீதியின் 273ஆம் இலக்கத்தில் அமைந்துள்ள அலுவலகம் மற்றும் அதன் வளாகம் முழுவதும் அதிகாரிகளால் விரிவாகச் சோதனையிடப்பட்டுள்ளது.
பல மணி நேரம் நீடித்த இந்தத் தேடுதல் நடவடிக்கையின் நிறைவில், டக்ளஸ் தேவானந்தா முன்னிலையில், கட்சியின் அலுவலக நிர்வாகப் பொறுப்பாளரிடம் குற்றப் புலனாய்வுத் திணைக்கள அதிகாரிகள் வாக்குமூலம் பெற்றுச் சென்றதாகத் தெரிவிக்கப்பட்டுள்ளது.
எனினும், இந்தத் தேடுதல் நடவடிக்கைக்கான முழுமையான காரணம் மற்றும் அதன் மூலம் ஏதேனும் பொருட்கள் அல்லது ஆவணங்கள் கைப்பற்றப்பட்டனவா என்பது தொடர்பான மேலதிக விவரங்கள் வெளியிடப்படவில்லை.
இந்தச் சம்பவம் தொடர்பில் மேலதிக தகவல்கள் வெளியாகும் நிலையில், யாழ்ப்பாண அரசியல் வட்டாரத்தில் இது கவனத்தைப் பெற்றுள்ளது.
