சீரற்ற வானிலை காரணமாக ஏற்பட்ட மண்சரிவைத் தொடர்ந்து, ரம்புக்கனை, பேராதனை மற்றும் கம்பளை இடையிலான ரயில் சேவைகள் இன்று (24) மற்றும் நாளை (25) தற்காலிகமாக இடைநிறுத்தப்பட்டுள்ளன.
கடிகமுவ ரயில் நிலையத்திற்கு அருகில் ஏற்பட்ட மண்சரிவினால் ரம்புக்கனை – பேராதனை இடையிலான ரயில் பாதையில் மண் சரிந்து விழுந்துள்ளது. இதனால் ரயில் போக்குவரத்துக்கு பாதுகாப்பு அச்சுறுத்தல் ஏற்பட்டுள்ளதாக ரயில்வே திணைக்களம் தெரிவித்துள்ளது.
பாதிக்கப்பட்ட பகுதியைச் சீரமைத்து, ரயில் பாதையைப் பாதுகாப்பான நிலைக்குக் கொண்டுவருவதற்காக இந்த இரு நாட்களிலும் அவசரப் புனரமைப்புப் பணிகள் முன்னெடுக்கப்படவுள்ளன.
குறித்த நாட்களில் பயணிப்பதற்காக ரயில் நிலையங்களில் முன்பதிவு செய்த பயணிகள் செலுத்திய தொகையை முழுமையாகத் திரும்பப் பெற்றுக்கொள்ள முடியும் எனவும் அறிவிக்கப்பட்டுள்ளது.
எனவே, இந்த வழித்தடத்தில் பயணிக்கத் திட்டமிட்டுள்ளவர்கள் மாற்றுப் போக்குவரத்து ஏற்பாடுகளைச் செய்துகொள்ளுமாறு கேட்டுக்கொள்ளப்படுகின்றனர்.
