ஜோர்டானின் தெற்குப் பகுதியில் உள்ள கரக் (Karak) மாகாணத்தில் தேவாலயமொன்றில் நடத்தப்பட்ட துப்பாக்கிச் சூட்டில் குறைந்தது 7 பேர் உயிரிழந்துள்ளதுடன், 34 பேர் காயமடைந்துள்ளதாக சர்வதேச ஊடகங்கள் செய்தி வெளியிட்டுள்ளன.
ஹமூத் கிராமத்தில் அமைந்துள்ள கிரேக்க மரபுவழி தேவாலயத்தில் வெள்ளிக்கிழமை (23) இறுதிச் சடங்கு நிகழ்வொன்று நடைபெற்றுக்கொண்டிருந்தபோது இந்தத் தாக்குதல் இடம்பெற்றுள்ளது.
வாகனமொன்றில் வந்த துப்பாக்கிதாரிகள் தேவாலயத்திற்கு அருகில் இறங்கி, அங்கிருந்தவர்கள் மீது சரமாரியாகத் துப்பாக்கிப் பிரயோகம் மேற்கொண்டதாகச் சம்பவத்தை நேரில் பார்த்தவர்கள் தெரிவித்துள்ளனர்.
ஜோர்டானின் அரச தொலைக்காட்சியில் ஒளிபரப்பப்பட்ட பாதுகாப்புக் கண்காணிப்பு காட்சிகளில், துப்பாக்கிதாரிகள் தேவாலயத்திற்கு அருகில் துப்பாக்கிப் பிரயோகம் மேற்கொள்ளும் காட்சிகள் பதிவாகியுள்ளன.
இந்தத் தாக்குதலில் காயமடைந்தவர்களில் பலர் மருத்துவமனைகளில் சிகிச்சை பெற்று வருகின்றனர். தாக்குதலுடன் தொடர்புடைய சந்தேகநபர்களைக் கைது செய்வதற்காகப் பாதுகாப்புப் படையினர் தேடுதல் நடவடிக்கைகளை முன்னெடுத்துள்ளனர்.
தாக்குதலுக்கான காரணம் மற்றும் அதில் ஈடுபட்டவர்களின் அடையாளம் தொடர்பான விசாரணைகள் தொடர்ந்து நடைபெற்று வருகின்றன. இந்தத் தாக்குதலுக்கு இதுவரை எந்தவொரு அமைப்பும் பொறுப்பேற்கவில்லை எனத் தெரிவிக்கப்பட்டுள்ளது.
