அமெரிக்காவின் அலாஸ்கா மாநில செனட் தேர்தலில் வாக்கு முடிவுகளை அதிகாரபூர்வமாக உறுதிப்படுத்துவதைத் தடுக்கக் கோரி, ஜனாதிபதி டொனால்ட் ட்ரம்ப் நிர்வாகம் நீதிமன்றத்தில் வழக்குத் தாக்கல் செய்துள்ளதாக சர்வதேச ஊடகங்கள் தெரிவிக்கின்றன.
அசோசியேட்டட் பிரஸ் (AP) வெளியிட்டுள்ள தகவலின்படி, அமெரிக்க நீதித்துறை இந்த வழக்கை அலாஸ்காவின் மத்திய நீதிமன்றத்தில் தாக்கல் செய்துள்ளது.
இந்தத் தேர்தலில் குடியரசுக் கட்சியின் தற்போதைய செனட்டர் டான் சல்லிவனுக்கும், ஜனநாயகக் கட்சியைச் சேர்ந்த முன்னாள் காங்கிரஸ் உறுப்பினர் மேரி பெல்டோலாவுக்கும் இடையே போட்டி நிலவுகிறது.
இதேவேளை, டேனியல் ஜே. சல்லிவன் என்ற பெயருடைய மற்றொரு வேட்பாளரும் தேர்தலில் போட்டியிடுகிறார். பெயர் ஒற்றுமையால் வாக்காளர்கள் குழப்பமடையக்கூடும் என்றும், இதனால் குடியரசுக் கட்சி வேட்பாளருக்குக் கிடைக்க வேண்டிய வாக்குகள் பிரிக்கப்படலாம் என்றும் அக்கட்சியினர் குற்றஞ்சாட்டியுள்ளனர்.
டேனியல் ஜே. சல்லிவனை வாக்குச் சீட்டிலிருந்து நீக்குவதற்கான முயற்சியை அலாஸ்கா உச்ச நீதிமன்றம் ஏற்கனவே நிராகரித்துள்ளது. இதனால், இருவரும் தேர்தலில் போட்டியிடும் நிலை ஏற்பட்டுள்ளது.
அலாஸ்காவில் நடைமுறையிலுள்ள விருப்பத் தெரிவு வாக்களிப்பு முறை காரணமாகவும் இந்தத் தேர்தல் கவனத்தைப் பெற்றுள்ளது. அமெரிக்க செனட் சபையில் எந்தக் கட்சி பெரும்பான்மையைப் பெறும் என்பதைத் தீர்மானிப்பதில் இத்தேர்தல் முக்கியத்துவம் பெறக்கூடும் எனக் கருதப்படுகிறது.
இந்த வழக்கு, தேர்தல் நடைமுறைகள் மற்றும் மாநிலத் தேர்தல் அதிகாரங்கள் தொடர்பாக அமெரிக்க மத்திய அரசுக்கும் மாநில நிர்வாகத்துக்கும் இடையே சட்டரீதியான சர்ச்சையை ஏற்படுத்தக்கூடும் என எதிர்பார்க்கப்படுகிறது.
