கொழும்பு மத்திய அஞ்சல் பரிமாற்ற நிலையத்தில் வெளிநாடுகளிலிருந்து அனுப்பப்பட்ட ஒன்பது அஞ்சல் பொதிகளுக்குள் மறைத்து வைக்கப்பட்டிருந்த 60.2 மில்லியன் ரூபாவுக்கும் அதிக பெறுமதியான போதைப்பொருட்களை இலங்கை சுங்கத் திணைக்களம் கைப்பற்றியுள்ளது.
இலங்கை சுங்கத் திணைக்களம் வெளியிட்டுள்ள அறிக்கையின்படி, கைப்பற்றப்பட்ட போதைப்பொருட்களில் குஷ் கஞ்சா, ஹஷிஷ், எக்ஸ்டசி மாத்திரைகள் மற்றும் கொக்கெய்ன் ஆகியவை அடங்குகின்றன. இவற்றின் மொத்த வீதிச் சந்தைப் பெறுமதி 60.265 மில்லியன் ரூபாவாக மதிப்பிடப்பட்டுள்ளது.
தாய்லாந்து, ஸ்பெயின், ஐக்கிய இராச்சியம் மற்றும் அமெரிக்கா ஆகிய நாடுகளிலிருந்து அனுப்பப்பட்ட இந்தப் பொதிகள், கடந்த சில மாதங்களாக வெளிநாட்டு அஞ்சல்களை வழக்கமான முறையில் பரிசோதித்தபோது சந்தேகத்தின் அடிப்படையில் அடையாளம் காணப்பட்டுள்ளன.
சந்தேகத்திற்கிடமான பொதிகள், அவற்றைப் பெற்றுக்கொள்ள வேண்டியவர்களால் எடுத்துச் செல்லப்படும் வரை சுங்க அதிகாரிகளால் தடுத்து வைக்கப்பட்டிருந்தன. எனினும், நிர்ணயிக்கப்பட்ட காலப்பகுதிக்குள் அவற்றைப் பெற்றுக்கொள்ள எவரும் வராததால், பொலிஸ் போதைப்பொருள் ஒழிப்புப் பிரிவின் (PNB) அதிகாரிகள் முன்னிலையில் அவை திறந்து பரிசோதிக்கப்பட்டுள்ளன.
இலங்கை சுங்கத் திணைக்களத்தின் போதைப்பொருள் கட்டுப்பாட்டுப் பிரிவு மற்றும் அஞ்சல் மதிப்பீட்டுப் பிரிவு அதிகாரிகளும் பொலிஸ் போதைப்பொருள் ஒழிப்புப் பிரிவு அதிகாரிகளும் இணைந்து இந்தப் பரிசோதனையை மேற்கொண்டுள்ளனர்.
கைப்பற்றப்பட்ட போதைப்பொருட்களின் விபரங்கள் வருமாறு:
- குஷ் கஞ்சா: 4,934 கிராம் – 49.34 மில்லியன் ரூபா பெறுமதி.
- ஹஷிஷ்: 1,035 கிராம் – 10.35 மில்லியன் ரூபா பெறுமதி.
- எக்ஸ்டசி மாத்திரைகள்: 25 கிராம் – 375,000 ரூபா பெறுமதி.
- கொக்கெய்ன்: 4 கிராம் – 200,000 ரூபா பெறுமதி.
ஒன்பது அஞ்சல் பொதிகளில் மூன்று தாய்லாந்திலிருந்து வந்துள்ளதுடன், ஸ்பெயின், ஐக்கிய இராச்சியம் மற்றும் அமெரிக்கா ஆகிய நாடுகளிலிருந்து தலா இரண்டு பொதிகள் வீதம் அனுப்பப்பட்டுள்ளன.
ஆரம்பகட்ட விசாரணைகளைத் தொடர்ந்து, கைப்பற்றப்பட்ட போதைப்பொருட்கள் மேலதிக விசாரணைகள் மற்றும் சட்ட நடவடிக்கைகளுக்காக பொலிஸ் போதைப்பொருள் ஒழிப்புப் பிரிவிடம் ஒப்படைக்கப்பட்டுள்ளதாக இலங்கை சுங்கத் திணைக்களம் தெரிவித்துள்ளது.
