வளிமண்டலவியல் திணைக்களத்தின் அறிக்கையின்படி, “முரசு” சூறாவளி இந்தியாவின் நிலப்பகுதியை அடைந்துள்ளதுடன், தொடர்ந்து வடக்கு – வடமேற்கு திசையில் நகரும் என எதிர்பார்க்கப்படுகிறது.
இன்று (3) முற்பகல் 11.30 மணியளவில் சுழல்காற்றாகக் காணப்படும் இந்தப் புயல், நள்ளிரவு 11.30 மணியளவில் வலுவிழந்து ஆழ்ந்த காற்றழுத்தத் தாழ்வு மண்டலமாக மாறும் என எதிர்வுகூறப்பட்டுள்ளது.
இதன் தாக்கத்தால் குறிப்பிடப்பட்ட கடற்பகுதிகளில் காற்றின் வேகம் மணிக்கு 65 முதல் 75 கிலோமீற்றர் வரை அதிகரிக்கக்கூடும். அத்துடன், பலத்த இடியுடன் கூடிய மழையும் பெய்யக்கூடும் என்பதால் கடற்பகுதிகள் கொந்தளிப்பாகக் காணப்படும் எனத் தெரிவிக்கப்பட்டுள்ளது.
எனவே, கடற்றொழிலாளர்கள் மற்றும் கடற்படைச் சமூகத்தினர் கடலுக்குச் செல்லும்போது மிகுந்த அவதானத்துடன் செயற்படுமாறு வளிமண்டலவியல் திணைக்களம் அறிவுறுத்தியுள்ளது.
