பயங்கரவாதத் தடைச் சட்டம் (PTA), பயங்கரவாதத்தில் இருந்து அரசைப் பாதுகாக்கும் சட்டமூலம் (PSTA) மற்றும் ஒழுங்கமைக்கப்பட்ட குற்றங்களைத் தடுக்கும் சட்டமூலம் (OCA) ஆகியவற்றை முழுமையாக இரத்துச் செய்யுமாறு வலியுறுத்தி, இன்று (04) நண்பகல் பாராளுமன்றத்திற்கு அருகில் எதிர்ப்பு ஆர்ப்பாட்டம் முன்னெடுக்கப்பட்டுள்ளது.
மக்கள் போராட்ட இயக்கத்தின் ஏற்பாட்டில் நடைபெற்ற இந்த ஆர்ப்பாட்டத்தில், முன்னிலை சோசலிசக் கட்சி, சுதந்திரத்துக்கான பெண்கள் இயக்கம் உள்ளிட்ட பல்வேறு சிவில் அமைப்புகளின் பிரதிநிதிகளும் ஆதரவாளர்களும் கலந்துகொண்டுள்ளனர்.
குறித்த சட்டங்களுக்கு எதிர்ப்புத் தெரிவிக்கும் வகையில், உடலில் பச்சை குத்தியிருப்பதைப் போன்ற தோற்றத்தில் சாயம் பூசியும், எதிர்ப்பு வாசகங்கள் மற்றும் கேலிச் சித்திரங்கள் பொறிக்கப்பட்ட பதாகைகளை ஏந்தியும் போராட்டக்காரர்கள் தமது எதிர்ப்பை வெளிப்படுத்தியுள்ளனர்.
மேலும், சிறைச்சாலைக் கம்பிகளைப் போன்ற உருவ அமைப்புகளைச் சுமந்தவாறு போராட்டக்காரர்கள் பாராளுமன்றத்தை நோக்கி நகர்ந்துள்ளனர்.
இதனையடுத்து, பாதுகாப்பு நடவடிக்கைகளுக்காக பொலிஸார் அப்பகுதிக்கு வரவழைக்கப்பட்டுள்ளதுடன், போராட்டக்காரர்கள் கோஷங்களை எழுப்பித் தொடர்ந்து ஆர்ப்பாட்டத்தில் ஈடுபட்டு வருகின்றனர்.
