இந்தியா மற்றும் இலங்கை அணிகளுக்கு இடையிலான ஒருநாள் சர்வதேச கிரிக்கெட் தொடரின் முதலாவது போட்டி நடைபெறும் இடத்தில் மாற்றம் செய்யப்பட்டுள்ளது.
டிசம்பர் 13ஆம் திகதி புதுடெல்லியில் நடைபெறவிருந்த முதலாவது ஒருநாள் போட்டி, தற்போது விசாகப்பட்டினத்தில் நடத்தப்படவுள்ளதாக இந்திய கிரிக்கெட் கட்டுப்பாட்டு சபை (BCCI) அறிவித்துள்ளது.
புதுடெல்லியில் உள்ள அருண் ஜெட்லி மைதானத்தில் மேற்கொள்ளப்படவுள்ள புனரமைப்புப் பணிகள் மற்றும் அக்காலப்பகுதியில் ஏற்படக்கூடிய வானிலைச் சிக்கல்கள் காரணமாக, போட்டி நடைபெறும் இடத்தை மாற்றுமாறு டெல்லி கிரிக்கெட் சங்கம் கோரிக்கை விடுத்திருந்தது.
இதனையடுத்து, டிசம்பர் 13ஆம் திகதி நடைபெறவுள்ள போட்டி விசாகப்பட்டினத்தில் உள்ள ACA-VDCA கிரிக்கெட் மைதானத்தில் நடத்தப்படவுள்ளது.
இரு அணிகளுக்கும் இடையிலான ஒருநாள் தொடரின் இரண்டாவது போட்டி டிசம்பர் 16ஆம் திகதி பெங்களூரிலும், மூன்றாவது போட்டி டிசம்பர் 19ஆம் திகதி அகமதாபாத்திலும் நடைபெறவுள்ளது.
இதனைத் தொடர்ந்து மூன்று போட்டிகளைக் கொண்ட இருபதுக்கு 20 தொடரும் நடைபெறவுள்ளது.
