இந்திய மகளிர் அணிக்கு உலகக் கிண்ணத்தை வென்றுகொடுத்த ஹர்மன்பிரீத் கவுர், தனது தலைவி பதவியில் இருந்து விலகுவதாக இன்று (06) உத்தியோகபூர்வமாக அறிவித்துள்ளார்.
மேலும் இந்திய மகளிர் கிரிக்கெட் அணியின் சகலத் துறைக்குமான தலைவி பதவியில் இருந்தும் விலகுவதாக அவர் அறிவித்துள்ளார்.
இந்திய கிரிக்கெட் கட்டுப்பாட்டுச் சபையுடன் இடம்பெற்ற முக்கிய ஆய்வுக்கூட்டத்துக்குப் பின்னர், சமூக வலைதளப் பதிவொன்றின் மூலம் அவர் இந்த அறிவிப்பை வெளியிட்டுள்ளார்.
தனது இந்த தீர்மானம் தொடர்பில் அவர் இவ்வாறு குறிப்பிட்டுள்ளார்.
“எனது இந்த முடிவு எளிதானதல்ல , பல ஆண்டுகளின் நினைவுகள், உணர்வுகள் மற்றும் தியாகங்களுடன் இந்த முடிவை எடுத்துள்ளேன்”.
எனினும் ஒரு வீராங்கனையாக இந்திய அணிக்குத் தொடர்ந்து முழுமையான பங்களிப்பை வழங்குவேன் எனவும் அவர் குறிப்பிட்டுள்ளார்.
ஹர்மன்பிரீத் கவுர் தலைமையில் இந்திய மகளிர் கிரிக்கெட் அணி சர்வதேச அரங்கில் பல முக்கிய போட்டிகளை வெற்றிகொண்டுள்ளது, பல சாதனைகளை நிலைநாட்டியுள்ளது.
அதில் மிகவும் முக்கியமாக , இந்திய மகளிர் கிரிக்கெட் வரலாற்றில் உலகக் கிண்ணத்தை வென்ற அணியின் தலைவி என்ற பெருமையை அவர் பெற்றுக்கொடுத்துள்ளார்.
அத்துடன் இந்த வருத்திற்கான (2026 ) ஆசிய விளையாட்டுப் போட்டிகளில் இந்திய அணிக்கு தங்கப் பதக்கம் வென்று கொடுத்ததுடன், பல சர்வதேச தொடர்களிலும் வெற்றியை பெற்றுக்கொடுத்துள்ளார்.
ஹர்மன்பிரீத் கவுரின் விலகலைத் தொடர்ந்து, இந்திய மகளிர் அணியின் அடுத்த தலைவி யார் என்ற எதிர்பார்ப்பு இந்திய கிரிக்கெட் ரசிகர்களிடையே அதிகரித்துள்ளது.
இப்போதைய துணைத் தலைவியான ஸ்மிருதி மந்தனா அடுத்த தலைவியாக நியமிக்கப்பட அதிக வாய்ப்புள்ளதாக இந்திய கிரிக்கெட் கட்டுப்பாட்டு சபையை மேற்கோள்காட்டி தகவல்கள் வெளியாகியுள்ளன.
எனினும், அடுத்த தலைவி தொடர்பான அதிகாரப்பூர்வ அறிவிப்பை இந்திய கிரிக்கெட் கட்டுப்பாட்டுச் சபை விரைவில் வெளியிடும் என எதிர்பார்க்கப்படுகிறது.
