2027ஆம் ஆண்டு சவூதி அரேபியாவில் நடைபெறத் திட்டமிடப்பட்டுள்ள ஆசியக் கிண்ண கால்பந்து தொடரை 2028ஆம் ஆண்டுக்கு ஒத்திவைப்பது தொடர்பாக ஆசியக் கால்பந்து கூட்டமைப்பு (AFC) பரிசீலித்து வருவதாக Reuters செய்தி வெளியிட்டுள்ளது.
மத்திய கிழக்கில் அதிகரித்து வரும் பாதுகாப்பு நெருக்கடி, சர்வதேச விளையாட்டு நிகழ்வுகளை நடத்துவதில் ஏற்படுத்தக்கூடிய தாக்கம் குறித்து கவலைகளை உருவாக்கியுள்ளது.
2027 ஜனவரி மாதம் நடைபெறத் திட்டமிடப்பட்டுள்ள இந்தத் தொடருக்காக ரியாத், ஜெத்தா மற்றும் அல்-கோபார் உள்ளிட்ட நகரங்களில் எட்டு மைதானங்கள் பயன்படுத்தப்படவுள்ளன. இருப்பினும், போட்டியை ஒத்திவைப்பது தொடர்பில் இதுவரை இறுதி முடிவு எடுக்கப்படவில்லை.
போட்டியின் பாதுகாப்பு ஏற்பாடுகள் மற்றும் பிராந்திய நிலைமைகளை நவம்பர் மாத இறுதி வரை கண்காணித்த பின்னர் அடுத்தகட்ட முடிவு எடுக்கப்படலாம் என AFC தலைவர் சல்மான் பின் இப்ராஹிம் அல் கலீஃபா தெரிவித்துள்ளார்.
இந்தத் தொடரில் ஆசியாவின் முன்னணி தேசிய அணிகள் பங்கேற்கவுள்ளதால், போட்டி நடைபெறும் திகதி தொடர்பான இறுதி அறிவிப்பு ரசிகர்கள், அணிகள் மற்றும் ஏற்பாட்டாளர்களுக்கு முக்கியமானதாக இருக்கும்.
